Natigayon nga mahimos ang mga nagaluyloy nga cable wires sang telecommunication companies sa Brgy Granada.
Ini kasunod sang pagdangop ni Punong Barangay Armado Vito sa Bombo Radyo Bacolod matapos nga halos tatlo ka semana na nga nagahatag sang peligro sa mga motorista ang mga kable.
Nahibaluan nga accident prone area na ngadaan ang blind curve nga dalan antes paman nasalawiran sang salakyan ang telco wires nga nagluyloy sa dalanon.
Ang dalan ang pasulod sa Charito Heights Subdivision nga alagyan padulong sa Brgy. Alangilan.
Makapila naman nga ginreklamo sang Punong Barangay ang sitwasyon apang wala sang nangin tikang ang telco.
Sa pagdangop sa Bombo Radyo Bacolod, nagpaandam na si Vito nga siya na mismo ang magapautod sang kable kun indi pa matandog subong nga adlaw.
Kaina nagpadala ang Globe Telecommunications sang ila nga boom truck kag ginhimos ang kuryente.
Ang telco ang nag-ayo naman sa Barangay sa pagbulig sa traffic management bangod madamo sang nagalabay nga salakyan sa dalan.
Pasado alas-12:00 kaina sang udto, natigayon na nga mahimos ang kable.
Apang panindugan gihapon sang Punong Barangay, nga sa masunod nga pagrequest sang telcos sang certification sa ila nga mga proyekto, irequire nila anay nga mahimos ang mga spaghetti wires.
Pahayag naman sang nagkay-o nga sila ang contractor lamang sang Globe kag nagahulat lamang kun tawgan sa pagresponder.
Sa interview sang Bombo Radyo Bacolod kay Juven, kahapon lamang sila gintawagan, apang bangod gab-i na kag madulom ang area, nagdesisyon sila nga kaina sang aga na lamang padayunon.
Suno diri, nadamage ang box kag ini ang gin-islan agud mabalik ang internet connection.
