27 ka mga balay sa Bacolod City nga nahamtang sa kilid ukon mismo sa suba ang natalana nga idemolish.
Sa interview sang Bombo Radyo Bacolod kay Punong Barangay Imelda Banguanga sang Brgy 2, Bacolod City, sila ang nagapatigayon na sang series of meetings upod sa Bacolod City Legal Office, kag ginpanugyan na sa ila ang pagproseso sang mga dokumento nga ginapangayo sang Bacolod City Housing Authority para sa relocation.
Una nga patigayunon ang demolition activity sa mga balay nga yara sa Mambuloc Creek, partikular na sa Purok Balinday, Barangay 2.
Pinaagi sini, makapreparar na sang financial allocations kag relocation area.
Apang aminado si Banguanga nga sa 27 ka balay nga idemolish, indi tanan ang makabatun sang relocation.
Ini bangod iban sa mga maapektuhan ang naka-avail na sadto sang relocation units, apang wala man gin-istaran.
Sa video nga ginpresentar, makita nga pila ka mga balay ang yara sa higad gid sang mga creeks kag may-ara nga nahamtang na mismo sa water ways nga nagatuga agud magsupon ang mga basura.
Ang mga balay man ang mabutang sa dako nga risgo sa tion nga mas mabaskog nga daludo ang tubig.
Suno kay Banguanga, wala naman sang nagpamatok sa mga ginpadal-an sang notice to vacate bangod nahangpan man nila nga safety man nila ang ginapaminsar.
Aminado man ang Punong Barangay nga apisar yara sa kilid kag mismo sa suba, wala man ini sang problema sa evacuation bangod ang mga pumuluyo ang kusa na nga nagapadulong sa evacuation center kun may-ara sang bagyo.
