Ginalauman nga makakolekta sang 30,000 tons sang debris ukon basura sa pagpatigayon sang clearing operations sang Tulong Pang-hanapbuhay sa Ating Disadvantaged/Displaced Workers (TUPAD) beneficiaries sa mga water ways sa Bacolod City.
Sa interview sang Bombo Radyo Bacolod kay Bacolod City Councilor Atty Caesar Distrito, spokesperson ni Congressman Alfredo “Albee” Benitez, ang mga TUPAD beneficiaries nga ginatawag sa karun nga ‘river warriors’ ukon ‘declogging workers’ ang nagafocus sa pagtinlo sa mga suludlon nga suba, sapa kag drainages nga indi malab-ot sang mga heavy equipments kaangay sang back hoe.
Ang TUPAD workers nga gindeploy sang Office of the Congressman, ang magatrabaho sa sulod sang 10 ka adlaw, kag sila ang nag-umpisa kahapon.
Suno kay Distrito madamo sang water ways nga nagsupon bangod sa mga kahoy kag basura, kag ini ang ginapanaugan sang mga river warriors agud maclear kag mangin tayuyon ang pag-ilig sang tubig.
May mga ginaprovide man nga mga Personal Protective Equipment (PPE) kaangay sang botas kag gloves.
Aminado ang konsehal nga ini ang short term solution lamang, kag ginahimo bilang pangaman inkaso nga may makusog nga ulan agud malikawan ang liwat nga pagbaha.
Agud maseguro naman nga may-ara gid sang mahuman ang mga river warriors, nagmando naman sa mga Barangay officials nga magbutang sang team leader nga magamonitor kag supervise sa operasyon.
