Natalana na nga irevoke ang lisensya sang anom ka jeepney drivers nga nagpositibo sa random drug testing sa Bacolod North Bus Terminal sang Oktobre 30, matapos maggwa ang resulta sang confirmatory test.
Madumduman nga ang Oplan Harabas ang ginpangunahan sang Land Transportation Office – Negros Island Region upod sa iban pa nga regional agencies, kun sa diin 100 ka mga drivers kag konduktor sang jeep, bus, taxi kag tricycle ang ginpaidalom sa random drug test.
Sa interview sang Bombo Radyo Bacolod kay LTO-NIR Director Atty Jeck Conlu, nag-abot na ang resulta sang confirmatory test gikan sa Cebu, kag positibo gihapon ang anom ka mga driver.
Apat diri ang driver sang modernized jeepneys kag duha ang driver sang traditional jeepneys.
Ginpadal-an na sang kopya sang result ang anom, samtang ginforward naman nila sa LTO Central Office ang resolusyon nga magarevoke sang lisensya sang mga drivers.
Madula man bisan ang ila prebilihiyo nga makakuha sang drivers license.
Suno kay Conlu, sa una palang nga pagpositibo sa Ceres North Terminal, ginkumpiskar na ang lisensya sang mga driver.
Pahayag sini nga magapadayun pa sila sa pagpatigayon sang random drug testing regionwide.
Pahanumdom sini nga mataas ang penalidad para sa mga drivers nga matukiban nga nagagamit sang illegal nga droga.
