Napadala na sang Department of Environment and Natural Resources – Negros Island Region ang request ni Negros Occidental Governor Eugenio “Bong” Lacson nga special permit nga masaylo sa iban nga lugar ang mga nakuha nga mga volcanic debris sa Ibid Creek sa banwa sang La Castellana, Negros Occidental.
Sa interview kay Charles Fabre, Regional Director sang DENR-NIR, gindetalye na nila ang mga rason sa report nga ginpasa nila sa central office para sa request sang special permit kag ginpasa kay DENR Secretary Raphael Lotilla.
Suno kay Fabre, ginhimuan na nila kaupod ang OCD Region 6 sang sequence of event kun ngaa kinahanglanon na ang special permit para pahanugutan ang pagkakas sang volcanic debris sa Ibid Creek sa Barangay Biaknabato, La Castellana, Negros Occidental.
Nahibaluan nga sang tinalikdan nakapadala na sang request ang gobernador sang probinsya nga pahanugutan ang commercial contractors nga magkuha sang volcanic materials sa suba.
Ini bangud ang manual nga pagpahigad sini ang indi epektibo kag nagabalik-balik lamang ini sa tion nga mag-inulan.
Ang permit ang kinahanglanon bangud ang lugar ang nalakip sa protected area ilabi na nga ini ang malapit MT Kanlaon Natural Park.
