Ginkumpirmar ni Bacolod City Lone District Congressman Alfredo “Albee” Benitez nga magabisita sa ciudad si President Ferdinand “Bongbong” Marcos Jr kag Department of Public Works and Highways Secretary Vince Dizon sa Biyernes.
Madumduman nga una na nga nakapahayag ang Presidente nga siya ang magatambong sa launching sang Oplan Kontra Baha sa Mambuloc Creek sa Brgy 10, Bacolod City sang Disyembre 6.
Apang ini ang wala madayun bangod sa pagsulod sang Bagyo WILMA.
Sa sidelines sang ikaduha nga Flood Mitigation Summit, ginpahayag ni Benitez nga nakabatun na ini sang kumpirmasyon nga makadto sa Bacolod City ang Presidente kag DPWH Secretary agud tsekyaron ang development sa ginapatigayon nga Oplan Kontra Baha.
Ang 2nd Flood Mitigation Summit sa Sugar Land hotel ang gintambungan sang nanarisari nga ahensya kaangay sang DPWH, Department of Environment and Natural Resources, Office of the Civil Defense, Department of Economy, Planning, and Development (DepDev), Department of the Interior and Local Government, Department of Science and Technology, mga opisyales sang Bacolod City Government kag iban pa.
Sang aga, sila ang nagpatigayon sang presentasyon kag sa hapon may-ara sang diskusyon kag paghatag sang mga suhestyon.
Ang 3rd summit ang magafocus naman sa appropriations kag fundings sang mga flood control projects.
Ang budget call ang patigayunon sa Marso 2026.
