Ginpangunahan mismo ni President Ferdinand “Bongbong” Marcos Jr. ang pagbukas sang bag-o nga Port of Banago.
Nag-abot sa ciudad sang Bacolod ang Presidente subong nga adlaw agud tsekyaron ang progress sang Oplan Kontra Baha sa Mambuloc Creek kasubong man agud saksihan ang unveiling sang bag-o nga Banago port.
Sa malip-ot nga mensahe sang Presidente, sa nahibaluan sini 1960s pa sang natukod ang daan nga Banago Port.
Ang daan nga passenger terminal area ang sarang lamang makacater sang 50 ka mga pasahero.
Apang ang bag-o nga passenger terminal ang sarang maka-akomodar sang 500 ka pasahero.
Suno sa presidente, ang desinyo sang Banago Port amo ang mangin standard design sang tanan nga pantalan sa pungsod.
Ini agud indi na magsala-sala ang mga pasahero sa nagkalain-lain nga terminal, kun palarehas na ang pwesto kag proseso antes makasakay sa barko.
Ang tatlo ka panalgan nga port passenger terminal ang may kalaparon nga 3,502 square meters.
Ang backup area lakip ang parking ang yara sa 5,600 square meters.
Samtang ang covered walkway padulong sa pantalan ang nagalaba sang 534.80 meters.
Ang bag-o nga Banago Port ang may total area nga 11,334.75 square meters.
May-ara man sang libre nga shuttle service nga magadul-ong sa mga pasahero gikan sa passenger terminal tubtob sa sakyan nga barko.
Ang passenger terminal ang hungod nga ginpalayo sa pantalan agud malayo sa storm surge ang pasilidad kag mga indibidwal sa sulod.
