Madamo sa mga residente sa Brgy 21, Victorias City ang nagreklamo matapos nga ginbawi ang P8,000 halin sa P10,000 nga ayuda nga ila nabaton.
Sa interview sang Bombo Radyo kay Felisa Oro, 76 anyos, sang nakabaton ini sang P10,000 nga ayuda gilayon ini nga nagpauli.
Suno diri, iya ginkakibot nga bawion sa iya ang P8,000 sa rason nga ihatag ini sa mga wala nakabaton apang nanindugan ini nga ang kwarta para sa iya santo man sa ginpermahan sini, amo nga wala sini ginbalik ang P8,000.
Suno kay Oro, wala siya sang bana kag kabataan kag nagasalig na lamang siya sa mabulig sa iya sang gobyerno.
Samtang, may iban naman nga nakabaton nga nagbalik sang P8,000 bangod sa kahadlok.
May yara sang ginpakita nga ID ang mga pumuluyo nga ginhatag sa ila agud makabaton sang ayuda kag sa ID nabutang ang nawong nanday Bacolod City Lone District Congressman Alfredo Benitez, Negros Occidental 3rd District Representative Javier Miguel Benitez kag Abang Lingkod Rep. Manuel Federick “Manman” Ko kag sa ibabaw nabutang ang ABANG LINGKOD PARTYLIST.
