Emosyonal ang isa ka amay matapos nga wala makakuha sang ayuda nga dako pa kuntani nga bulig sa iya pamilya sa Brgy 21, Victorias City.
Sa interview sang Bombo Radyo kay Eduardo Tresvalles, nagatrabaho bilang manug-scrap, sang Disyembre 10 wala ini nagtrabaho para magpila sa pay out sang ayuda nga P10,000.
Suno diri, bitbit sini ang iya mga dokumento kag ID nga ginhatag sa ila, apang nakibot ini sang ginbawi ang iya form.
Ginhambalan siya nga kuhaon ang iya form bangod kulang ang budget kag indi na ini mahatagan bangod ang number sini yara sa masobra 700.
Suno kay Trevalles, ginhambalan ini nga tawagan lamang siya sa masunod kun may yara na sang budget.
Pahayag ni Trevalles, dako pa kuntani nga bulig ang kwarta nga mabaton sini para sa capital niya sa pagpangscrap kag ginsakripisyo pa sini ang isa ka adlaw niya nga trabaho.
Si Trevalles, may tatlo ka menor de edad nga bata kag siya lamang ang nagatrabaho para sa iya pamilya.
Panugyan sini nga kuntani ang kwarta nga para sa tawo ihatag sang insakto.
