Liwat nga gin-athag ni Negros Occidental Provincial Administrator Atty. Rayfrando Diaz ang guidelines sa pagpatuman sang One Hospital Command.
Madumduman nga nagpahayag si Cadiz City Mayor Salvador “Bading” Escalante nga bangod sa One Hospital Command imbes nga ideretso ang mga pasyente kaangay sang mga biktima sang aksidente, sila ang ginapahulat lamang sa gwa sakay sa ila service vehicle ukon sa ambulansya tubtob nga clear na sila kag mapasulod.
Suno kay Diaz, kun sin-o man ang may emergency case, deretso na ini nga pasudlon sa emergency room para mahatagan sang immediate attention kag kun estable na ang kondisyon sang pasyente, amo pa lang nga irefer ini sa iban nga ospital.
Ang One Hospital Command para lamang sa mga medical cases kaangay sang mapa-check up agud mamonitor ang pagsulod kag paggwa sang pasyente kag kun ano nga klase sang balatian ang nagasulod sa ospital.
Pahayag ni Diaz, ang problema ang yara sa mga triage kag ER nga nagarason sa mga pasyente nga indi sila kasulod sa ospital kun wala sang referral.
Pa-athag sini santo sa polisiya sang One Hospital Command dapat ederetso na pasulod sa ospital ang pasyente nga may emergency case kag indi na nga pangayoan sang referral.
