Ginpahayag ni Bacolod City Administrator Atty. Mark Steven Mayo nga nagakadapat gid lamang nga imbestigaran ang natabo nga pan-os nga pagkaon ang ginserbe sa selebrasyon sang Employees’ Day sang Biyernes.
Sa interview kay Mayo, nakabaton sila sang reklamo halin sa mga empleyado kag mga department heads nga iban sa ila nakakaon sang pan-os kag iban wala na lang nagkaon.
Suno diri, may yara man sang naghambal nga nagreklamo sila nga pan-os ang pagkaon kag ginhambalan nga islan lang, apang ang gin-ilis pan-os man sa gihapon.
Suno kay Mayo, dapat lamang nga imbestigaran ini bangod gin-cash advance ang P3.2 million nga budget para sa urgency sang activity kun sa diin kapin sa P1.2 million ang naalokar nga pondo para sa pagkaon.
Pahayag sini, dapat mahibaloan kun ngaa ginpabayad ang ciudad para sa pagkaon nga wala napuslan.
Tuman nga nadismaya si Mayor Greg Gasataya sa natabo amo nga luyag sini nga mahibaloan kun ano ang rason ngaa naglain ang pagkaon, sin-o ang caterer kag ano ang sistema sa pagpanagtag sang pagkaon.
Kahapon, may ginpatigayon na nga meeting ang Bacolod City Government Employees Union angot sa isyu, kag siya makighinon-anon pa sa BCGEU kun ano ang ila nadiskusyonan.
