Naghatag sang pahanumdom ang regional director sang Department of Health- Negros Island Region para sa healthy nga pagselebrar sang paskwa kag bag-ong tuig.
Sa interview sang Bombo Radyo kay Dr Razel Nikka Hao, on stadby na sila kag ang mga ospitals sa karun yara na sa code white alert humalin sang Disyembre 22 nga magalawig tubtob sa Enero 26 kadungan sa heightened surveillance period sa holiday.
Suno diri, ila ginbantayan ang pagluntad sang mga insidente nga related sa mga palupok kag road accidents nga nagaduging sa tion sang holiday season.
Samtang, ila man ginabantayan ang pagduging man sang non communicable diseases kaangay sang stroke, asthma, heart attack kag iban pa.
Suno kay Hao, sa karun nga holiday madamo sang pagkaon apang nagpahumdom ini nga likawan nga magpasobra sa pagkaon sang matam-is kag mantikaon.
Pahayag sini, indi malain nga maghanda sang pagkaon para sa okasyon apang indi man manami kun sobra-sobra naman ang kaon.
Mahibaloan nga ang main office sang DOH-NIR yara sa Negros Oriental Provincial Hospital sa Dumaguete City apang may satellite office man sila diri sa ciudad sang Bacolod.
