Ginpanawagan sang convenor sang Water Watch Negros nga dapat mapahibalo sa pumuluyo ang terms and conditions sa pagpanag-iya sang Crystal Bridges Holding Corporation sa Primewater bangod posible maliwat sa gihapon nga ang tag-iya lamang ang makabenepisyo kag padayon nga maga-antos ang mga consumers.
Sa interview sang Bombo Radyo Bacolod kay Wennie Sancho, madugay na nga ginacriticize ang performance sang Primewater bangod sa palpak sini nga serbisyo.
Suno diri, nahibaluan na lang nga ginbakal na sang negosyante nga si Lucio Co ang Primewater apang ang pamangkot diri kun ano ang terms and conditions sang transaction, ang financial obligations sang BACIWA kag Primewater, kag kun ano ang plano sang Crystal Bridges Holding Corporation.
Dugang pa sini, naeksperyensyahan na sadto sang mga consumers ang palpak nga serbisyo sang pamilya Villar nga naghatag lang sang promisa nga wala natuman.
Pahayag ni Sancho, indi dapat pagtagoon sa mga consumers ang transaction bangod ang pumuluyo man ang nagaka-apektohan sang ila serbisyo samtang ang owner naman ang nagabenepisyo.
