Pilason ang isa ka hinablos matapos ginwasay sang iya tiyo bangod sa gina-alegar ini ang nadakpan nga nagasampaw sa live-in partner sang suspect alas-8:00 kahapon sang aga sa Hacienda Palencia, Brgy. La Granja, La Carlota City.
Ang biktima ang ginkilala nga si Anthony Martenesio, 27 anyos, migrant worker kag residente sa Bugasong, Antique; samtang ang suspect amo si Jimmy Martenesio, 36 anyos, migrant worker kag residente man sa kaangay nga lugar sa Antique.
Sa interview sang Bombo Radyo kay PCapt Dan Carlo Salazar, Deputy Chief of Police sang La Carlota City Police Station, nadakpan si Anthony nga nagasampaw sa live-in partner ni Jimmy amo nga ginwasay ni Jimmy sa ulo ang iya hinablos.
Suno diri, gilayon naman nga gindala sa ospital si Anthony para sa nagakaigo nga medical attention.
Indi gid man makusog ang pagwasay ni Jimmy kag yara na sa estable nga kondisyon ang iya hinablos.
Samtang si Jimmy naman yara sa kustodiya sang La Carlota City Police Station.
Wala naman sang plano nga magpasaka sang kaso ang pamilya ni Anthony kag nagsettle na lang ang pamilya ni Jimmy nga sila ang mabayad sa pagpabulong sa ginwasay nga hinablos.
