Patay ang 40 anyos nga lalaki matapos nga ginlabo sang magtambag sa magtiyo nga wala nag-intsindihanay sa Purok Molave, Barangay Tabugon, Kabankalan City, Negros Occidental, kahapon alas 5:00 ang takna sang hapon, December 30, 2025.
Ang biktima ang isa ka pintor samtang ang suspek ang ginkilala kay alyas Roby 72 anyos, kasado, mangunguma kag lunsay mga residente sang nasambit nga lugar.
Sa interview sang Bombo Radyo Bacolod kay Police Lt. Col. Roberto Indiape, hepe sang Kabankalan City Police Station, ang biktima kag ang suspek nagalakat apang ang suspek kag ang hinablos sini ang nagabaisay.
Suno kay Indiape ginsaway ini sang biktima ang suspek nga tama na samtang ang hinablos sang suspek ang nagpalagyo na.
Nagpauli ang suspek kag nagkuha sang espading kag wala sang madamo nga estorya ginlabo sini ang biktima kag naigo sang makaduha ka beses sa liog.
Ang suspek ang nakainum man sang makahulubog nga ilimnon.
Gindala sa ospital ang biktima apang gindeklarar nga patay na ini.
Ang suspek ang nadakpan man kag nakahunong na sa Kabankalan City Police Station.
Natalana ini nga pasakaan sang kaso nga murder.
Nagpanugyan ang hepe sang Kabankalan City Police Station nga likawan ang kinagamo kasunod sang pagsugata sang bag-ong tuig, maghalong sa pagbiyahe kag magpangamuyo.
