Nangin madinalag-on ang inisyatibo sang Murcia Municipal Police Station nga “Boga baylo Bugas.”
Sa interview sang Bombo Radyo Bacolod kay Police Captain Honey Labaro, hepe sang Murcia Municipal Police Station, sila ang una na nga nagapatigayon sang Armas baylo Bugas.
Suno diri, may ara sang mandato gikan sa PNP Headquarters nga nagamando sa pagkumpiskar sang tanan nga boga.
Apang sila ang nakaangkon sang kabudlayan kag wala gid sang makuha bangod kun makita pa lamang sang mga kabataan nga may boga ang police patrol, sila ang nagapinalagyo kag ginatago ang Boga.
Bangod sini, napinsaran ang pagpatigayon sang “Boga baylo Bugas,” nga nangin madinalag-on man matapos nga ginikanan na mismo ang nagadul-ong sang Boga.
Suno kay Labaro, kalabanan nga nagagamit sang Boga ang mga kabataan, apang ini ang may risgo partikular na sa ginagamit nga alcohol kasubong man sa posibilidad nga maglupok ang materyales nga gingamit sa ila nga mga nawong, gani ini ang ginlakip sa listahan sang illegal firecrackers.
Ginapakamaayo ni Labaro nga wala sang may narecord nga firecracker related incident sa Murcia, nga mahimo resulta man sang ila padayun nga information dissemination sa risgo sang palupok.
Pahanumdom man sini sa ginikanan nga indi tugutan ang mga kabataan nga magpalupok, kasubong man ang magpamulot sang mga wala naglupok nga palupok matapos ang New Year’s celebration.
