Nageksperyensya sang pagbaha ang pila ka bahin sang ciudad sang Escalante bangod sa madamol nga pag-ulan kahapon sang kaagahon.
Sa interview sang Bombo Radyo Bacolod kay Provincial Disaster Risk Reduction Management Council Head Irene Bel Ploteña, apat ka sitio sang Brgy Mabini ang ginbaha bangod sa madamol nga pag-ulan tuga sang localized thunderstorm.
Suno diri, wala sang gin-evacutae nga pumuluyo kag wala man sang reported injuries.
May bahin naman sang dalan nga wala naagyan apang nagsubside man ang baha alas-8:00 sang aga.
Suno kay Ploteña, ginpatskeyar na ang mga waterways nga posible may pagbara kag ginpahawanan na.
Pahayag sini, sa karun wala sang Low Pressure Area nga namonitor apang ang easterlies ang nagatuga sang localized thunderstorm sa probinsya.
Pahanumdom ni Ploteña, ang preparasyon naga-umpisa sa kada isa kag sa komunidad kag mas maayo nga ang tagsa ka panimalay nagaprerar sa posibilidad nga pagluntad sang pagbaha.
Samtang, nagapabilin nga yara sa Blue Alert status ang Negros Occidental Provincial Disaster Risk Reduction Management Council tubtob alas- 8:00 subong nga aga bangud sa Holiday Celebrations.
