Isa nagpositibo sa ginpatigayon nga random drug test sang Land Transportation Office – Negros Island Region sa Bacolod South Terminal subong nga adlaw para sa Oplan Harabas.
Kaupod sang LTO- NIR ang Philippine Drug Enforcement Agency – Negros Island Region, Bacolod City Police Office kag Highway Patrol Group – Negros Island Region sa pag-implementar sang Oplan Harabas.
Sa interview sang Bombo Radyo Bacolod kay LTO-NIR Director Atty Jeck Conlu, 100 ang target nila nga mapaidalom sa drug test nga ginalakipan sang mga drayber kag konduktor sang tricycle, taxi, modernized jeep, traditional jeep, kag mga bus.
Suno diri, may isa nga nagpositibo kag ang sample sini ipadala sa probinsya sang Cebu para sa confirmation kag kun liwat nga magpositibo, mahimo irevoke ang lisensya sang indibidwal.
Suno kay Conlu, nalipay ini nga nagakooperar ang mga drayber kag konduktor nga wala na nagpamalibad sa pagpartisipar sa random drug test.
Samtang, suportado sang presidente sang Bacolod Alliance of Commuters, Operators and Drivers (BACOD) – Manibela ang pagpatigayon sang random drug test sang Land Transportation Office – Negros Island Region.
Sa interview sang Bombo Radyo Bacolod kay Rudy Catedral, presidente sang Bacolod Alliance of Commuters, Operators and Drivers (BACOD) – Manibela, bilang transport leader nagasuporta ini sa programa sang LTO agud mapakita sa mga commuters nga hugot nga ginakondenar ang paggamit sang illegal nga druga sang mga drayber kag konduktor.
