Patay ang driver sang motorsiklo matapos maaksidente sa Circumferential Road, Bangga Active, Barangay Mandalagan, Bacolod City pasado alas-9:00 sang Huwebes sang gab-i, Enero 8.
Sa interview sang Bombo Radyo kay Police Major Elmer Bonilla, head sang Traffic Enforcement Unit sang Bacolod City Police Office, ginkilala ang biktima nga si Quirico Aribas Oro Jr., 38-anyos, residente sang Purok Bayanihan, Brgy. Banago, Bacolod City.
Suno kay Bonilla, ang biktima ang nag-overshoot kag nabunggo sa road signage rason nga nagtabog ini gikan sa iya motorsiklo kag nadulaan sang pangalibutan.
Ang biktima ang nakaagom sang pilas sa nagkalain-lain nga bahin sang iya lawas.
Ginhingagaw pa ini revive kag gilayon nga gindala sa ospital apang ini ang ginbawian sang kabuhi.
Suno kay Bonilla, ginapatihan nga madasig ang pagpadalagan sang biktima kag ang madulom nga kurbada nga dalan ang isa sa mga rason nga nadaluan ini sang kontrol sa pagmaneho.
Panawagan ni Bonilla sa mga driver nga maghalong kag maghinay lamang sa pagdrive.
