Nagpasalig ang regional director sang Police Regional Office-Negros Island Region (PRO-NIR) nga manabat sa krimen nga ginhimo sini ang police nga suspek sa pagtiro-patay sa isa ka babayi kag tatlo ka police sa Sibulan, Negros Oriental.
Sa interview sang Bombo Radyo Bacolod kay Police Brigadier General Arnold Thomas Ibay, wala sang extrajudicial confession sa bahin sang ni Police Staff Sgt Bonifacio Saycon, ang suspek nga nagpatay sa apat ka mga biktima.
Suno kay Ibay, indi man nila mapilit nga mapasugid si Saycon samtang wala sang assistance sang abugado.
Suno diri, indi nila pagtabunan ang ginhimo sang police personnel kag siguruhon nga manabat ini sa krimen nga ginhimo.
Madumduman nga nag-inom inom ang mga pulis sa pagselebrar sang kaadlawan ni Cimafranca sa SAB Resto Bar kun sa diin gin-table nila ang Guest Relations Officer (GRO) nga si Chiela Mae Dinawanao.
Sa CCTV footage sang Resto Bar, nakit-an nga nagpungko si Dinawanao sa tupad ni Cimafranca sang nagtindog si Saycon kag ini ang gintiro.
Naggwa sang makadali si Saycon apang nagbalik kag ginluthang sa ulo si Dinawanao.
Amo pa lang nga nagreact ang tatlo ka pulis nga kaupod ni Saycon kag nag-upod sa suspek papagwa sa Resto Bar.
Nagsakay ang mga pulis sa salakyan ni Cimafranca, apang gintiro man ni Saycon ang tatlo ka kaupod kag nagpalagyo.
Nagsurrender man si Saycon sa Tanjay City Police Station alas-10:40 sang gab-i.
