Duha ka armas luthang ang gingamit sa pagpatay sang tatlo ka mga pulis kag isa ka sibilyan sa Sibulan, Negros Oriental.
Sa pahayag ni Police Regional Office – Negros Island Region Director Police Brig Gen Arnold Thomas Ibay, caliber .45 pistol ang una nga gingamit ni Police Staff Sgt Bonifacio Saycon sa pagluthang sa Guest Relations Officer (GRO) nga si Chiela Mae Dinawanao, samtang caliber .9mm naman ang gingamit sa pagluthang sa iya kaupdanan nga sanday Police Captain Jose Edrohil Cimafranca, hepe sang Sibulan Municipal Police Station; Police Senior Master Sgt Tristan Chua; kag Patrolman Rey Albert Temblor.
Ginkumpirmar ni Ibay nga anom ka grupo sang kapulisan ang nagsulod sa Restobar.
Suno diri, hinali nga gintiro ni Saycon si Dinawanao kag gilayon man nga nagwa si Saycon sa bar matapos ang krimen kag ginsundan sang tatlo niya nga kaupod nga mga pulis kag nagsakay sila sa salakyan nga ginapanag-iyahan sang hepe.
Didto na gintiro ni Saycon ang tatlo ka mga kaupdanan sini.
Dugang pa ni Ibay nga si Cimafranca kag Saycon ang close sa isa kag isa-sa kag sila ang updanay man kun sa diin ma-assign nga station.
Gani pahayag ni Ibay nga katingalahan ang pagpangluthang ni Saycon sa isa ka sibilyan kag sa mga kaupdanan sini.
Pasalig ni Ibay nga hugot niya nga ginamonitor ang development sang amo nga kaso.
Suno diri, subong nga adlaw, ipaidalom na sa inquest proceedings si Saycon.
Sa karun, padayon pa nga ginatumod sang kapulisan kun ano ang motibo sa krimen.
