Pilason ang isa ka construction worker matapos ginlaslas sa li-og sang iya katrabaho bangud sa gina-alegar pagpanghurikap sa Sitio Moning, Barangay Cabadiangan, Sipalay City sang Enero 11.
Sa impormasyon nga nakuha sang Bombo News Team, ginkilala ang biktima nga si Mark Talaver, 37-anyos, residente sang Purok 6, Barangay 5, Sipalay City samtang ang suspek naman ang ginkilala nga si Christopher Ma-alat, 26-anyos, residente sang Barangay Cabadiangan.
Suno sa Sipalay City Police Station, boluntaryo nga nagsungka ang suspek sa police station kag gin-ako ang paglaslas sang li-og sang biktima.
Nahibaluan nga ang asawa ni Ma-alat ang nagpanugid sa iya nga ginhukirap siya ni Talaver sa pribado nga bahin sang iya nga lawas.
Ini ang nangin rasun ni Mala-at sa paglaslas sang li-og ni Talaver gamit ang binangon.
Gilayon naman nga gindala si Talaver sa Sipalay City Infirmary para sa nagakaigo nga pagbulong kag ini ang yara na sa estable nga kondisyon.
Sa karun, yara na sa kustodiya sang kapulisan si Ma-alat para sa nagakaigo nga disposisyon.
