Nagapati ang School Division Superintendent sang Negros Occidental nga makabulig ang pagbutang sang CCTV sa sulod sang classrooms para mamonitor kun may bullying nga nagakatabo.
Sa interview sang Bombo Radyo Bacolod kay Gladys Amylaine Sales, tanan nga DepEd leaders, school heads, kag principals may derektiba nga halongan ang mga estudyante.
Suno diri, kun may kaso sang bullying, responsibiliadad ini nila nga magprovide sang safety sa mga kabataan.
Sa tion nga may kaangay nga insidente, dapat hibaloon sang manunudlo ang bilog nga detalye sa insidente kag ireport ini sa school head.
Suno kay Sales, indi tanan nga nagakatabo makita sang manunudlo sa sulod sang classroom apang nakita sini sa iban nga private schools nga epektibo ang pagbutang sang CCTV.
Paagi sini maobserbaran ang giyo sang mga bata kag nagpasalig man ini nga confedential man ang mga footage nga makuha.
Apang, mabudlay man sa gihapon suno kay Sales nga mahibaloan ang tanan nga nagakatabo ilabi na nga kalabanan sa bullying nagakatabo sa CR, likod sang mga building, ukon sa mga lugar nga tago.
Mensahe ni Sales sa mga estudyante nga mangin friendly kag pahanumdom sini sa mga ginikanan nga esturyahon ang mga bata agud malaygayan sang insakto.
