Halos indi na makabig nga dalan ang Barangay road sa Sitio Nabatang tubtob Sitio Kalaw-anan sa Brgy Prosperidad, San Carlos City.// Sa Ipa-Bombo Ta segment, ginpahayag sang pulis kag pari nga si Rev Fr Alexander Repaso, ginakasubo sini nga sang iya ginpost sa social media ang kahimtangan sang ila lugar, madamo pa ang naakig sa iya.
Suno diri, humalin pa sang bata, amo na ang sitwasyon sa lugar kun sa diin tuman ka budlay sang dalan ilabi na kun naga-ulan bangod sa tuman ka lutak.
Dugang pa sini nga halos 4×4 nga salakyan lamang ang makalabay ukon habal-habal, samtang madamo naman sang mga naaksidente sa area.
Suno kay Repaso, ginpahayag ni San Carlos City Mayor Renato Gustilo nga kun may-ara sang mga concerns nga luyag idangop sa ciudad, magpalapit lamang sa Barangay, bangod ang Barangay amo ang magapalab-ot sang concern sa City Government.
Apang sang ginkadtuan sini si Punong Barangay Sostines Tranilla agud ipalab-ot ang concern, ginsabat lamang ini sang kapitan nga wala ini sang mabulig bangod kontra partido ang mga nagapuyo sa lugar.
Pahayag ni Repaso nga masakit para sa iya ang nabatian, bangod bilang kaangay nga public servant, kuntani ang una sini nga dangpon amo ang ikaayo sang mga nasakupan nga pumuluyo.
Suno diri, ang dalan ang nagakonekta sa dalan sang Brgy Pinuwayan, Salvador Benedicto.
Pahayag sini nga sang ginpost niya ang sitwasyon sa lugar, ang mga taga Brgy Pinuwayan lamang ang nagdagyaw agud tampukan ang dalan para may labayan, apang apisar nga ang area ang sakop sa area of responsibility sang Brgy Prosperidad, sila ang wala gid sang may ginbulig.
