Ginklaro sang alkalde sa Bacolod City nga ang required lamang sa pag-install sang CCTV camera amo ang mga negosyo nga may capitalization nga P3 million pasaka.
Ini kasunod sang nangin pahayag sang Bacolod City Office of the Building Official, nga maidid nila nga tseyaron ang CCTV sang mga negosyo.
Nahibaluan nga madamo sang mga negosyo nga nagabutang lamang sang CCTV apang indi operational, kundi ginabutang lamang nga design, agud makapasar sa pagkuha sang building permit.
Bangod sa announcement, madamo man sang mga magagmay nga mga negosyo nga nagapamangkot kun sila ang required man sa pag-install sang CCTV.
Sa idalom sang CCTV ordinance sang ciudad, kinahanglan magbutang sang CCTV camera sa mga strategic areas sa gwa sang mga establishimento.
Ini agud indi na makaangkon sang kabudlayan sa imbestigasyon inkaso may magluntad nga mga krimen, kinawatay kag iban pa.
Ang City Ordinance No. 600 series of 2012 ang nagamando sa tanan nga mga bangko, financial institutions kag mga negosyo nga may capitalization nga P3 million pasaka agud makabulig sa assessment sang security, kag mapasanyog ang crime preventon kag investigations.
