Wala pa gihapon nadakpan ang barker nga nagtiro sa kaupod sini nga barker bangod sa agaway sa pwesto sa pagpasaka sang pasahero sa Libertad Public Market.
Ang biktima ang ginkilala nga si Alyas Rolando, 39 anyos, residente sang Brgy 38; samtang ang suspect ang ginkilala nga si Alyas Roger, single, residente sang Brgy Taculing, Bacolod City.
Sa interview sang Bombo Radyo Bacolod kay Police Captain Peter John Ramos, officer in charge sang Bacolod Police Station 6, padayun sa gihapon ang ila nga hot pursuit.
Ginpadulungan nila ang balay ni Alyas Roger apang wala nakita ang suspect.
Wala naman sa karun sang mga barker sa Libertad Public Market gani wala na sang mapamangkutan.
Ginavalidate pa sa karun sang kapulisan ang impormasyon nga may kaupod ang suspect, kag ang involvement sini sa krimen.
Madumduman nga sa inisyal nga impormasyon, matapos ang pagbaisay sang duha ka barker, naglakat na ang biktima apang ini ang ginsundan sang suspect.
Natabo ang pagpangluthang malapit sa University of Negros Occidental – Recolletos, kun sa diin nakaangkon sang samad sa hawak kag paa ang biktima.
Estable na sa karun ang kondisyon sang biktima, apang kinahanglan pa nga ipaidalom sa operasyon.
Nahibaluan nga apisar may pulis sa merkado, wala maabtan kag malagas ang suspect bangod may nagsugid sa ila nga ini ang nagsakay sa tricycle, apang sa ulihi natumod nga ebike ang escape vehicle sang suspetsado.
