Ginklaro sang Konsehal nga indi lang penalidad ang kaundanan sang anti mendicancy ordinance kundi amo man ang pagkontrol sang mga gapanglimos sa ciudad sang Bacolod.
Sa interview sang Bombo Radyo kay Councilor Israel Salanga, Chairman sa Committee on Social Services sa Sangguniang Panlungsod, normal lang ang reaksyon sang pila ka pumuluyo sa pagpatuman sa amo nga ordinansa.
Nahibaluan nga ang City Ordinace No. 1112 ang magahatag sang penalidad sa mga nagapanglimos kag sa nagahatag sang limos.
Santo sa ordinansa, ang nagapangayo sang limos ang sarang mamultahan sang P1,000 kag posible nga mapriso sa sulod sang isa ka bulan.
Samtang, kun ini ang ikaduha na nga beses nga madakpan nga nagapangayo sa gihapon sang limos, ini ang magapangatubang sang penalidad nga P1,000 pesos kag posible nga mapriso sa sulod sang anum ka bulan.
May ara man sang penalidad nga P500 sa madakpan nga magahatag sang limos.
Paathag ni Salanga, tinutuyo sa ordinansa nga maproteksyonan ang pumuluyo.
Ini bangud madamo na sila sang nabaton nga reklamo angot sa nagapangayo sang limos lakip na ang harassment kag suno diri, ang ordinansa ang ginapatusman agud indi na masulit an kaangay nga insidente.
