Nangin madinalag-on ang ground breaking ceremony para sa construction sang Cell No. 5 sa sanitary landfill sa Brgy Felisa, Bacolod City kaina sang aga.
Ang aktibidad ang gintambungan ni Bacolod City Mayor Greg Gasataya; Regional, Provincial kag City DENR Officials, Punong Barangay Francisco Hilado sang Brgy Felisa kag mga Barangay officials.
Ginsuguran na ang construction sang Cell No 5 bangod malapit na nga isarado ang Cell No 4.
Nahibaluan nga apat tubtob sa lima ka layers lamang ginahatag nga limit sa kada cell bangod sa risgo nga magcollapse kaangay sa natabo sa Cebu, kun padayun pagid nga pataasan.
Ginalantaw nga matapos ang construction sa sulod sang apat tubtob lima ka bulan.
Sa welcome speech ni Councilor Homer Bais, chairman sang Committee on Environment Ecology sa Sangguniang Panlungsod, ini ang indi ordinaryo nga ground breaking, bangod ini ang simbolismo sang pagbuka sang cycle kag pagguba sa madugay na nga problema sa basura sa pagpanguna sang alkalde.
Ginalantaw nga ulihi na nga cell ang Cell No 5 bangod sa pagpatuman sang Waste to Energy project.
Pahayag ni Bais nga may masanag nga palaabuton nga nagahulat para sa Brgy Felisa.
Luwas sa Waste to Energy project, madamo pa sang dalagko nga mga proyekto para sa ciudad.
Suno kay Bais, ang dalagkuan nga mga pagbag-o nga ginsuguran sang Benitez Administration ang pagatapuson sang Gasataya Administration.
