Padayon pa nga ginapangita sang mga otoridad ang mangingisda nga ginreport sang himata nga wala pa makapauli.
Sa interview sang Bombo Radyo Bacolod kay Commander Artzell Anacan, commander sang Coast Guard Station Negros Occidental, nagpadulong sa coast guard station si Antonio Barte amay ni Anthony Barte, ang wala pa nakapauli nga mangingisda agud ipahibalo nga wala pa nakapauli ang iya anak.
Suno kay Anacan, sa impormasyon nga ila nabaton si Anthony Barte ang nagpalawod sakay sa bangka nga may pinta green kag white alas 3:00 ang takna sang hapon sang Enero 27.
Siya ang nagaedad sang 40 anyos kag residente sang Barangay 1, Bacolod City.
Suno sa commander matapos nga mabaton ang report gilayon man Sila nagpalapta sang impormasyon sa mga barko nga nagabiyahe padulong sa Dumangas kag kasubong man sa coastal areas sang Banago.
Ginpalab-ot man ni Anacan sa Bombo Radyo Bacolod kag sa iban nga mainstream media stations sa ciudad sang Bacolod ang impormasyon para sa dugang nga panawagan.
