Ginkumpirmar sang regional director sang Land Transportation Office-Negros Island Region nga 20 ka mga drivers kag helper ang nagpositibo sa ginpatigayon nga surprise drug test sa Negros Oriental, kahapon, Enero 29, 2026.
Sa interview sang Bombo Radyo Bacolod kay LTO NIR Regional Director Jeck Conlu, sa ginpatigayon nga Oplan Harabas ukon surprise drug testing sa 193 ka mga bus drivers kag conductors, truck drivers kag helpers, delivery riders, jeepney drivers kag E-trike drivers, 20 diri ang nagpositibo.
Ini ginalakipan sang 14 ka truck drivers, isa ka truck helper, isa ka jeepney driver, tatlo ka tricycle driver kag isa ka ebike drivers.
Suno kay Conlu kaupod sang Land Transportation Office – Negros Island Region nga nagpatigayon sang nasambit nga aktibidad ang Philippine Drug Enforcement Agency – Negros Island Region, Coast Guard District Southern Visayas, Police Regional Office – Negros Island Region, Regional Highway Patrol Unit – Negros Island Region, Department of Health, Provincial Government sang Negros Oriental kag Local Government Unit sang Dumaguete City.
Suno kay Conlu, ang mga specimen sang nagpositibo ang ginpadala na sa Cebu agud ipaidalom sa confirmatory test.
Sa tion nga magpositibo ang mga ini sa confirmatory test , mapaidalom ang mga ini ang ipaidalom sa proseso kun sa diin una padal-an ang mga ini sang show cause order kag ikaduha ang proseso sang revocation sang drivers license.
Suno sa LTO-NIR regional director, Indi lang bus, truck, tricycle kag public utility jeepney sa Dumaguete City ang ginpatigayunan sang surprise drug test kag ginlakip ang e-trike drivers bangud ang mga ini ang nagaserbe man sa publiko.
