Patay ang isa ka senior citizen samtang pilason naman ang duha ka indibidwal sa nagluntad nga aksidente sa Barangay Road, Barangay Chambery, Manapla, sang Lunes, Pebrero 2 pasado alas-6:00 sang gab-i.
Sa interview sang Bombo Radyo Bacolod kay Police Captain Marion Vicente Buenaflor, hepe sang Manapla Municipal Police Station, naglapaw ang motor nga ginamaneho sang isa ka 60-anyos nga lalaki nga ginkilala nga si alyas Floren sang makalab-ot ini sa kurbadahan, samtang nagapadulong man ang isa ka motorsiklo nga ginamaneho sang 27-anyos nga lalaki nga ginkilala nga si alyas Franz, gani nagbungguanay ang duha ka motorsiklo.
Nakaagom sang minor injuries si Franz kag ang back rider ni Floren nga si Alyas Araceli samtang ginbawian naman sang kabuhi ang 60-anyos samtang ginabulong sa ospital.
Suno kay Buenaflor, lunsay mga wala sang lisensya ang duha ka driver kag wala man madala ang Official Receipt (OR) kag Certificate of Registration (CR) sang ila mga motorsiklo sa tion sang insidente.
Ang duha ka motorsiklo ang yara subong sa kustodiya sang Manapla Municipal Police Station para sa nagakaigo nga disposisyon.
Padayon man ang imbestigasyon sang kapulisan sa nagluntad nga insidente.
