May pahanumdom ang Bacolod City Fire Station sa mga nagagamit sang kandila ukon kingki, kasunod sang ikaduha na nga sunog sa Brgy 10, Bacolod City subong nga 2026.
Nahibaluan nga 11 ka balay ang nahalitan sang sunog sa Purok Magtiayon, Brgy 10 kagab-i nga ginalakipan sang anom ka totally damaged kag lima ka partially damaged.
Nagdangat naman sa 41 ang indibidwal nga apektado.
Madumduman nga sang Enero 24, may nagluntad man nga sunog sa Prk Tambi Palad, Brgy 10.
Sa interview sang Bombo Radyo Bacolod kay Fire Inspector Jemarie Tapiru, deputy fire marshal sang Bacolod City Fire Station, ang sunog nagligad sa Prk Tambi Palad ang malapit lamang sa back entrance sang Brgy 10, apang ang sunog sa Prk Magtiayon kagab-i ang suludlon kag sila ang naglabay pa sa makitid nga mga eskinita.
Suno diri, ang sunog ang ginapahayag nag-umpisa sa balay ni Ellie Cristobal alas-9:38 sang gab-i.
Ini ang ginreport sa ila alas-9:43, na-under control alas-9:55, kag nafire-out alas-10:05 sang gab-i.
Ang kahalitan sang sunog ang ginabanta nagadangat sa P75,000.
Madasig nga natumod sa ila imbestigasyon nga kandila ang rasun sa sunog bangod ang balay nga ginhalinan ang kapin isa ka bulan na nga wala sang kuryente, kag wala man sang iban pa nga nakita nga sarang makatuga sang kalayo.
Apang bangod human sa light materials ang kadam-an nga mga balay, madasig nga naglapta ang kalayo.
Panawagan ni Tapiru sa mga pumuluyo sa Brgy 10, partikular na sa mga balay nga nagagamit lamang sang kandila ukon kingki, nga seguruhon nga mapatay ang mga ini antes maghalin sa balay ukon antes magtulog.
