Nagalaom ang gobernador sa Negros Occidental nga makapauli man gilayon ang mga nagbakwit nga residente bangod sa paglupok sang Bulkan Kanlaon.
Madumduman nga nagluntad ang moderately explosive eruption alas-4:39 kahapon sang hapon, kun sa diin ang pagbuga sang abo ang naglawig sang 40 minutos.
Kaina sang aga, halos wala na sang makita nga sinyales sang paglupok gikan sa bulkan, kag daw kaangay nga wala sang may natabo nga paglupok.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, anom ka local government units ang apektado sang ashfall kag pag-usbong sang baho sang asupre.
Ini ang ginabug-usan sang 41 ka Barangay gikan sa Bago City, Pontevedra, La Carlota City, La Castellana, Hinigaran kag Valladolid.
Suno kay Lacson, wala pa sang LGUs nga nagpangayo sang bulig sa provincial government, apang sila ang nakapreparar naman sang mga mahimo ibulig.
Isa sa ginalantaw nga mangin problema amo ang kontaminado nga water sources bangod sa abo.
Epektibo man suno sa gobernador ang ginapatuman sang Department of Social Welfare and Development nga prepositioning sang relief goods, para sa mas madasig nga pagpalab-ot sang bulig sa mga kalamidad.
