Dako ang ginsaka sang presyo sa produktong petrolyo matapos ang pagpang-atake sang Iran sa pila ka bahin sa Middle East bilang sabat sa pagpang-atake sang Estados Unidos kag Israel.
Gin-untat sang Qatar Energy ang produksyon sang Liquefied Natural Gas (LNG) matapos maigo sang drone ang ila nga pasilidad.
Gin-atake man ang pila ka mga barko malapit sa Strait of Hormuz, isa ka importante nga ruta nga ginaagyan sang halos 20 percent sang supply sang langis kag gas sa bug-os nga kalibutan.
Nagsarurot ang mga stock market sa Estados Unidos kag Europa bangud sa ginalauman nga pagtaas sang inflation kun magpadayon ang pagsaka sang presyo sa enerhiya.
Samtang nagsaka man ang presyo sang bulawan bilang safe-haven asset.
Nagpa-abiso ang mga eksperto nga mahimo magdangat sa 100 dollars ukon kapin P1,800 kada bariles sang petrolyo kun magpadayon ang giyera nga posible magatuga sang pagsaka sang presyo sang gasolina kag iban pa nga balaklon.
