Gin-athag sang City Director sang Department of the Interior and Local Government sa Bacolod City nga wala nalakip ang mga Barangay sa pagpatuman sang 4-day workweek.
Sa intreview sang Bombo Radyo Bacolod kay DILG Bacolod Director Christian Nagaynay, magapabilin nga alas-8:00 sang aga tubtob alas-5:00 sang hapon, Lunes tubtob Biyernes ang trabaho sa Barangay.
Ini ang ginklaro ni Nagaynay kasunod sang pagpagwa sang Bacolod City Government sang resolusyon nga nagapatuman sang 4-days’ workweek sa mga empleyado sang ciudad.
Paathag ni Nagaynay nga indi pwede nga maapektuhan ang paghatag sang serbisyo ilabi na nga may mga nagadangop nga constituents sa mga Barangay.
Dugang pa nga indi man kinahanglan nga magtinir gid sa Barangay hall ang mga opisyales.
Sa pihak sini, ang DILG ang nagpanaog sang mga guidelines sa energy conservation.
Lakip na diri ang pagtalana sang oras sa pagpasiga sang mga suga kag paglimit sa konsumo sang aircon.
Limitahan man nila ang paggamit sang government vehicles agud indi mahakog sa gatong, kag magamit inkaso may emerhensya.
