Nagdangop sa Bombo Radyo Bacolod ang duha ka lalaki nga gintanyagan sang trabaho apang ginkawat ang ila mga cellphone, kwarta, sapatos kag iban pa nga gamit.
Ang duha ka nabiktima amo sanday Adrian Zarraga, 18 anyos, residente sang Barangay 21, Victorias City kag Erlie Onganon, 19 anyos residente sang barangay 19 A, Victorias City.
Sa interview sang Bombo Radyo kay Zarraga, kahapon nakabaton ini sang message gikan sa iya abyan nga si John Mark nga nagapamangkot kun nagapangita ini sang trabaho.
Suno diri, si John Mark, schoolmate nila sadto kag ila abyan nga nagapuyo man sa Victorias City.
Suno kay Zarraga, ginhambalan siya ni John Mark nga may hiring para sa merchandiser sa isa ka mall sa ciudad sa sweldo nga P580 kada adlaw.
Gin-message man ni Zarraga ang abyan sini nga si Onganon nga nagapangita man sang trabaho.
May yara sang group chat nga ginhimo para sa ila tanan nga nag-apply kag ang naga-assist sa ila amo si Crissah Porras Passia nga nagahatag sang mga instructions kun ano ang ila himoon.
Ginhambalan sila nga may yara sang orientation nga patigayonon sa Bacolod City kahapon.
Alas- 9:00 sang aga nag-abot sila nga duha sa bus terminal kag ginhambalan nga may yara sang ma-assist sa ila.
May lalaki nga miyembro sang LGBTQ nga nag-upod sa ila para sa ila orientation sa barangay Mandalagan.
Ang lalaki itomon, putot, kag may scar sa butkon.
Ginhambalan sila nga indi sila makasulod bangod wala sila sang gatepass amo nga kuhaon sini ang ila mga gamit kag isulod sa locker room kag paggwa sini, dal-on niya ang ila gatepass.
Apang, nagdangat sa kapin isa ka oras ang ila hulat kag wala gid nagbalik ang lalaki amo man nga wala nabalik ang ila mga gamit.
Samtang, halos tanan nga gamit sang duha ka biktima sang scam nataban sang nagpakuno-kuno nga recruiter.
Ang duha ka nabiktima amo sanday Adrian Zarraga, 18 anyos, residente sang barangay 21, Victorias City kag Erlie Onganon, 19 anyos residente sang barangay 19 A, Victorias City.
Sa interview kay Onganon, ginhambalan sila sang naga-assist sa ila nga si Crissah Porras Passia nga hulaton nila ang maupod sa ila para sa orientation kag ginpakakas sa ila ang ila mga relo, polseras, ginpa-uba sa ila ang ila sapatos kag ginpa-ilis sang tsinelas sa pasalig nga may yara sang safety shoes nga ipaggamit sa ila, kag ginpangkuha ang ila mga cellphone bangod ginabawal ini sa orientation.
Ginsulod nila tanan nila nga gamit sa ila mga bag bangod suno sa lalaki nga miyembro sang LGBTQ nga siya na lang madala sang ila bag sa locker room samtang ginahimo pa ang ila gatepass kag pagbalik sini bitbit na niya ang ila gate pass.
Apang, naghulat ang duha sa pagbalik sang lalaki tubtob nga naglawig na sa kapin isa ka oras kag wala na nila nakita pa ang lalaki nga nagdala sang ila bag.
Nasulod sa ila bag ang cellphone, sapatos, kwarta, relo, bayo, short, jacket kag iban pa.
Suno kay Onganon, nakita nila ang iban nga empleyado nagasulod bisan wala sang dala nga gatepass amo nga nagpalapit sila sa gwardya para mamangkot.
Ginhambalan sila sang gwardya nga sadto may yara man sang duha ka babayi nga nabiktima sang lalaki nga miyembro sang LGBTQ paagi sa amo man nga pagpangscam.
Gintinguhaan man nila mag message sa ila abyan nga si John Mark apang wala na ini nagareply sa ila kag ginkakas naman sila sa group chat sang nagrecruit sa ila.
Mensahe ni Zarraga kag Onganon sa mga nagapangita sang trabaho nga indi magdali-dali kun may mabatonan nga offer bisan dako ukon gamay man ang sweldo kag nagpasalamat sila sa mga empleyado sang isa ka mall nga nag-amot amot para may plete sila papauli.
