Pilason ang duha ka indibidwal matapos gintiro sang wala pa makilal-an nga persona sa Brgy 10, Bacolod City pasado alas-11:00 kagab-i.
Sa interview sang Bombo Radyo Bacolod kay Police Major Eugene Tolentino, hepe sang Bacolod Police Station 2, duha ka persona nga pilason nga gilayon man nga gindala sang mga Barangay officials sa ospital agud madapatan sang nagakaigo nga pagbulong.
Suno kay Tolentino, nabatian sang mga residente ang duha ka lupok apang nakapalagyo naman gilayon ang suspek antes pa man maabtan sang mga residente.
Suno diri, may yara na sang pangalan ang kapulisan sang posible nga may kahimuan sang krimen apang indi pa ini nila mahingadlan.
Gilayon man nga nagpatigayon sang hot pursuit operation ang kapulisan kagab-i.
Suno kay Tolentino, wala pa matumod kun ano gid ang gingamit nga armas luthang apang ginalantaw sini nga mahimo isa ka cal .45 pistol.
Sa karon, padayon pa ang imbestigasyon sang kapulisan agud matukiban ang motibo kag madakpan ang suspek.
