Napasakaan na sang kaso ang 47 anyos nga lalaki nga nadakpan sa ginpatigayon nga routine checkpoint sang Talisay City Police Station sa may bahin sang Mabini Highway, Barangay Zone 14-A, Talisay City sang Lunes sang gab-i.
Ang lalaki ang ginkilala nga si alyas “Nixon”, residente sang Buenritero 2, Barangay Bubog, Talisay City.
Sa interview sang Bombo Radyo Bacolod kay Police Lt. John Patrick Linda, Deputy Chief of Police for operation sang Talisay City Police Station, nagpatigayon sila sang detailed checkpoint kag ang nadakpan ang nagamaneho sang motorsiklo nga wala sang plate number.
Suno kay Linda, ginpapondo ini sang mga kapulisan bangud sa paglapas sa local ordinance sang Talisay City nga wala sang plate number.
Sang ginkuhaan na ini sang litrato nakita sang mga kapulisan nga nagalabaw sa iya sling bag ang armas-luthang.
Nagpakilala man ini nga security guard apang wala man sang ID nga mapakita agud nga magpamatuod.
Magluwas sa iligal nga nagahupot sang mga armas-luthang kag wala man sang nagakaigo nga dokumento sa iya nga motorsiklo.
Narekober diri ang isa ka caliber .38 revolver, isa ka loaded caliber .22 revolver nga wala sang serial number, sling bag, kag ang motorsiklo nga wala sang plaka.
Ang suspek kag ang nakumpiskar ang yara sa kustodiya sang Talisay City Police Station kag napasakaan na sang kaso nga paglapas sa RA 10591 ukon Comprehensive Firearms and Ammunition Regulation Act.
