Ginpahayag sang Department of Energy (DOE) nga ang pag-amyendar sang Oil Deregulation Law ang pinaka-importante nga tikang nga dapat tutukan sang Kongreso agud maprotektahan ang pungsod sa nagapadayon nga pagsaka sang presyo sang langis ilabi na sa panahon sang krisis.
Sa House Committee on Ways and Means, gin-usisa ni Rep. Alfredo Garbin Jr. si Energy Secretary Sharon Garin kun ano nga mga emergency legislative amendments ang ginarekomenda sang ahensya agud masabat ang pagmahal sang produktong petrolyo.
Dugang pa, ginpamangkot man kun pabor ang ahensya sa inventory disclosure, anti-profiteering triggers, ukon ang temporaryo nga suspensyon sang excise tax kag VAT adjustment para sa produkto nga diesel.
Sabat ni Garin, apisar epektibo ang layi sa normal nga sitwasyon, indi ini supisyente kun may mga pangkalibutan nga krisis.
Aminado man ang tiglikom nga vulnerable ang Pilipinas bangud nabatyagan gid sa pungsod ang epekto sang global price hike.
Magluwas sa pag-amyenda sang Oil Deregulation Law, ginaduso man sang ahensya ang polisa tuhoy sa unbundling kag ang pagpasanyog sang gahom sang DOE sa industriya.
Ginsambit man sang ahensya nga ginabanta sa 20 percent sang kabug-usan nga pump price sa mga gasolinahan ang naghalin sa excise tax.
