Wala sang nadihon nga kasugtanan ang ginpatigayon nga pag-istoryahany sa tunga sang Iran kag Estados Unidos, suno sa pahayag ni U.S. Vice President JD Vance.
Ang pagsinapol ang naglawig sang kapin 21 ka oras halin Abril 11 tubtob Abril 12, nga gintambungan sang mga tiglawas gikan sa Estados Unidos, Iran, kag Pakistan.
Ang delegasyon sang Amerika ginlakipan man sang US special envoy nga si Steve Witkoff kag Jared Kushner, umagad ni U.S. President Donald Trump.
Tinutuyo sang negosasyon nga palawigon ang ceasefire matapos ang anum ka semana nga gyera nga nagtuga sang daku nga kahalitan kag krisis sa ekonomiya sa bug-os nga kalibutan.
Suno sa mga report, lakip sa mga sensitibo nga topiko ang natuhoy sa uranium sang Iran, seguridad sa Strait of Hormuz, kag mga kondisyon para sa mas malig-on nga ceasefire.
Sa pihak sang kapaslawan nga makahimo sang kasugtanan, nagapabilin nga bukas ang posibilidad sang isa pa ka paghambalanay sa masunod nga mga semana.
Ang kapaslawan sang negosasyon ang ginakabig nga daku nga epekto para sa Iran, nga padayon nga nagapangatubang sang pressure gikan sa international community kag sang mga sanctions.
Suno kay Vance, nagapabilin nga hugot ang desisyon sang Estados Unidos nga indi magkompromiso tubtob indi masabat ang mga nagapanguna nga isyu sa seguridad kag mga nuclear program sang Iran.
