Patay ang anay konsehal sa banwa sang Isabela matapos gintiro sang apat ka persona nga sakay sa duha ka motorsiklo sa Sitio GMA, Brgy Payao, Binalbagan alas-5:00 kahapon sang hapon.
Ang biktima ang ginkilala nga si Rodulfo Pajardo, residente sa Brgy 4, Isabela, anay Sangguniang Bayan member sang banwa, nakaserbe man bilang Punong Barangay kag isa ka retired Army.
Sa interview sang Bombo Radyo Bacolod kay Police Captain Joelan Vinson, hepe sang Binalbagan Municipal Police Station, ang biktima ang nagpadulong sa iya kakampuhan nga nga ginapahilamunan sini.
Pagdangat sa lugar, hinali man nga nag-abot ang duha ka motorsiklo nga parehas nga may tig-isa nga angkas.
Hinali na lamang gintiro si Pajardo sang duha ka backrider, kag ini ang nag-agom sang igo sang bala sa ulo, lawas kag sa hita nga gintunaan sang iya kamatayon.
Gilayon naman nga nagpalagyo ang apat padulong sa nabukid nga bahin sang Brgy Payao.
Narecover sa crime scene ang mga basiyo sang cal 45 kag 9mm pistol.
Padayun sa karun ang maid-id nga imbestigasyon sa krimen, kag nagapangita man ang kapulisan sang mahimo nakawitness agud matumod ang mga suspects kag motibo sa krimen.
