Ginkumpirmar sang National Security Council (NSC) nga nagpositibo sa toxic chemical cyanide ang mga yellow bottles nga narecover sa Chinese boats nga nagabiyahe malapit sa BRP Sierra Madre sa Ayungin Shoal.
Suno kay NSC spokesperson Cornelio Valencia Jr., nakuha sang Philippine Navy ang nasambit nga mga botelya sang Pebrero 20 kag Oktubre 24, sang nakaligad nga tuig.
Ginpaidalom ini sa examination sang National Bureau of Investigation Forensic and Scientific Research Service.
Suno sa konseho, ginakahangaw-an ang presensya sang cyanide sa lugar bangud posible ini magdala sang katalagman sa mga Philippine Navy personnel amo man sa palangabuhian sang mga mananagat nga Pinoy.
Nagpaandam man ang opisyal sang NSC nga ang cyanide ang nagahalit sa mga coral reefs sa palibot sang shoal, nga mahimo makaapekto sa structural stability sang BRP Sierra Madre.
Gintawag man sang NSC nga iresponsable ang na-report nga paggamit sang hazardous substances sang mga Chinese vessels sa lugar.
Ginmanduan na ang Armed Forces of the Philippines kaupod ang Philippine Coast Guard nga pabaskugon ang maritime domain awareness, pabaskugon ang pagpatrolya sa lugar, kag likawan ang dugang nga kahalitan sa palibot.
