Ginpaathag ni President Ferdinand “Bongbong” Marcos Jr. nga wala nagapahina sa posisyon sang Pilipinas sa isyu sang sovereign rights kag territorial defense ang ginkasugtan nga provisional understanding sang Pilipinas kag China tuhoy sa Rotation and Resupply (RORE) missions para sa BRP Sierra Madre sa Ayungin Shoal.
Sa presidential luncheon nga gin-host sang Foreign Correspondents Association of the Philippines (FOCAP), ginpahayag ni Marcos nga nagatutok sa sala nga butang ang pila ka mga diskusyon natuhoy sa RORE deal sa China.
Suno sa presidente, tuyo sang nasambit nga arrangements nga malikawan ang miscalculation nga mahimo magresulta sa tensyon kag posible nga conflict.
Suno diri, kinahanglan nga mapadayon man ang resupply missions para sa mga Filipino troops nga nagapabilin sa BRP Sierra Madre, nga grounded sa Ayungin Shoal humalin pa sang 1999 kag naga-serbe nga outpost sang Philippine troops sa ginaagawan nga isla.
Paathag ni Marcos, sa kada RORE mission, nagahatag lamang ang Pilipinas sang notice sa hulag sang mga barko sa West Philippine Sea.// Suno diri, isa ini ka “standard” practice para sa mga barko nga nagabyahe sa nasambit nga bahin.
Ginpaathag man sini nga indi kinahanglan maghingyo sang permiso ang Pilipinas agud makapatigayon sang RORE missions.
Ginpahayag sang presidente nga wala sini gina-surrender ang territorial claims sang Pilipinas, ilabi na ang mga kinamatarong nga nakasandig sa United Nations Convention on the Law of the Sea (UNCLOS) kag sa arbitral award.
