Ginpahayag sang traditional jeepney driver nga kun kaisa P250 na lang ang mapauli sini sa iya pamilya bangod sa tuman ka mahal nga presyo sang diesel.
Sa interview sang Bombo Radyo kay Melchor Romayon, naga-upod gid ini basta may yara transport strike nga patigayonon para mapakigbato ang ila palangabuhian.
Suno diri, tuman na kabudlay para sa ila ang magbyahe bangod ang ila matipon nga kwarta nagakadto na lang sa krudo.
Suno kay Romayon, kun sadto masobra P1,000 pa ang iya mapauli sa iya pamilya subong halos P250 ukon P300 na lang ang iya mapauli gikan sa 14 oras sini nga byahe.
Ginabudget sini ang iya kwarta nga makabakal sang duha ka kilo nga bugas kag ang sobra ibakal niya sang sud-an.
Nagapasalamat na lamang ini nga bisan papaano may gamay nga negosyo ang iya asawa apang ginakulang sila sa gihapon bangod tatlo sa kabataan sini ang naga-eskwela sang college.
Dugang pa sini, kun ikumpara sa iban mas maayo na lamang nga siya man mismo ang nagapanag-iya sang salakyan nga iya ginabyahe sangsa nga mang-arkila ini sang salakyan kag basi kun wala na gid siya sang sobra sa iya ginbyahe.
Pahayag ni Romayon, maayo pa ang Local Government Unit nga naghatag sang lima ka kilo nga bugas sa mga drivers samtang ang national government naman wala pa gid sang may ginhatag nga assistance.
