Nagapreparar na si Atty. Manases Carpio, bana ni Vice President Sara Duterte, sa pagpasaka sang criminal case batok sa pila ka mga opisyal sang Bangko Sentral ng Pilipinas (BSP), Anti-Money Laundering Council (AMLC), kag pila ka mga kongresista sa Quezon City Prosecutor’s Office subong nga adlaw, Abril 27.
Kalakip sa mga ginareklamo sanday BSP Governor Eli Remolona Jr., AMLC Executive Director Ronel Buenaventura, kag pila ka mga katapo sang Kamara kaangay nanday House Committee on Justice Chair Gerville Luistro, Percival Cendania, Chel Diokno sang Akbayan Party-List kag Mamamayang Liberal Party-List Leila de Lima.
Ini ang gina-alegar base sa paglapas sa Anti-Money Laundering Act, Bank Secrecy Law, kag Data Privacy Act bangud sa gina-alegar pagpagwa sang mga sensitibo nga banking records.
Kasunod ini sang report sang AMLC sa Kamara nga may yara sang halos P6.77 billion nga “suspicious” kag “covered” nga mga transaksyon konektado nanday Vice President Sara Duterte kag Carpio sa sulod sang halos duha ka dekada.
Ginpanindugan ni Carpio nga iligal ang ginaalegar pagpaguwa sang mga records kag ginagamit ini para sa “black propaganda” batuk sa pamilya Duterte, ilabi na sa tunga sang mga isyu sa pulitika kag impeachment proceedings.
Suno sa iya, protektado sang layi ang bank records kag indi dapat pag-ibuyagyag.
Hugot naman nga ginpanginwala sang pila ka mga mamalidha ang alegasyon.
Suno kay De Lima kag Cendaña, yara sa hurisdiksyon sang Kamara ang impeachment hearing kag indi ini paglapas sa bank secrecy laws.
Ginapanindugan nila nga kabahin ini sang proseso sang accountability kag may yara sang legal nga basehan sa paghinun-anon sang mga transaksyon pinansyal kun may yara sang isyu sang posible nga mga anomaliya.
