Nangin madinalag-on ang ginpatigayon nga pay out sang Land Transportation Franchising and Regulatory Board sa mga kwalipikado nga drivers sang Public Untility Jeepneys (PUJ), TNVS, Taxi kag service provider sa Bacolod City kahapon.
Sa interview sang Bombo Radyo Bacolod kay Atty. Gerry Llena, Director sang LTFRB- Negros Island Region, kapin 800 tubtob 900 ang nahatagan sang subsidy kahapon humalin alas- 9:00 sang aga kag natapos alas- 4:00 sang hapon.
Suno diri, matawhay nga natigayon ang pay out bangod komportable ang mga drivers sa venue sa isa ka mall sa ciudad sang Bacolod.
Nakabaton ang mga taxi drivers sang P5,000 cash samtang ang PUJ drivers naman nakabaton sang P1,500 kag ang operators naman nakabaton sang P10,000 bangod nakadepende sa classification kun pila ang ila mabaton.
Suno kay Llena, may masunod pa nga batch nga makabaton sang ayuda nga ginabanta yara sa 1,000 tubtob 1,200 ka drivers.
Samtang, hugot man nila nga ginabantayan kun sin-o ang mga drivers nga nakabaton na sang ayuda sang tinalikdan apang nagpasa pa liwat sang ila pangalan.
