Nagfile sang criminal complaints ang 42 ka mga former employees sang Vallacar Transit Inc. matapos maulamid sa away sang pamilya Yanson.
Ang complaints ginfile kahapon, isa ka adlaw antes ang Labor Day.
Sa interview sang Bombo Radyo Bacolod kay Human rights lawyer Atty Dino De Leon, counsel sang mga complainants, bangod sa away sang magpamilya may mga empleyado nga nadulaan sang trabaho, napressure nga magpili kun sa diin sila nga bahin masuporta kag nahadlok matapos nga sudlon sang kapulisan kag militar ang main office sang Vallacar Transit Inc. bisan wala sang court order.
Suno diri, gintayaan sang armas ang mga empleyado kag ginpahog, kag ang mga wala nag-upod sa pagsuporta, ginpahalin sa trabaho.
Suno kay De Leon, may natabo nga human and labor rights abuse amo nga may ginfile nga complaint nga grave coercion batok kanday Olivia Yanson, Leo Rey Yanson, kag Ginnette Dumancas kag iban pa nga opisyales sang kompaniya.
Nagapati ini nga indi pwede nga ini nga mga butang ginahimo sa mga empleyado kag indi dapat paggamiton ang kapulisan kag militar para sa away sang pamilya.
Pahayag ni De Leon, iya ginapakigbato nga indi dapat maulamid ang mga enosente nga empleyado kag desido ini nga ipakigbato ang 42 ka mga empleyado sa mga bayolasyon batok sa ila.
