Patay ang 37-anyos nga lalaki matapos ginlampusan sang tubo sa Townhouse Verde, Barangay Estefania, Bacolod City, pasado alas-2:00 kahapon sang aga, Abril 30.
Ang biktima ang ginkilala nga si alyas “Michael”, 37-anyos, kag residente sang Purok Pag-asa, Barangay Estefania samtang ang suspek naman amo si alyas “Tayson”, yara sa legal nga pang-edaron, kag residente sang Purok Tingson 2, Barangay Estefania.
Sa inisyal nga imbestigasyon, si Michael ang naga-inom-inom sang makahulubog nga ilimnon kaupod si Tayson kag ang amay sini nga si alyas “Antinero” sa balay sang suspek sang natabo ang indi paghangpanay sa tunga sang suspek kag sang biktima.
Samtang nagabinaisay, nagtindog si Tayson kag ginkuha ang steel pipe nga yara sa kilid sang ila balay kag ginlampusan si Michael sa nawala nga bahin sang iya kilay.
Nahimo pa ni Michael makapalagyo apang ginlaut ini ni Tayson kag liwat nga ginlampusan sa ulo nga nangin rason sang iya kamatayon.
Matapos ang insidente, gilayon nalagyo ang suspetsado sa wala mahibaluan nga direksyon.
Narekober sa crime scene ang steel pipe nga may kalabaon nga 50 inches.
