Gin-athag sang Department of Environment and Natural Resources – Negros Island Region (DENR-NIR) nga indi endemic sa Negros Island ang Philippine king cobra kasunod sa nakit-an nga gina-alegar king cobra sa toilet bowl sang isa ka resort sa banwa sang Don Salvador Benedicto.
Sa interview sang Bombo Radyo Bacolod kay Engr. Joan Nathaniel Gerangaya, Assistant Regional Director for Technical Services sang DENR-NIR, iya ginkakibot nga gilayon nagdeklarar ang nag-upload sang video nga king cobra ang naggwa sa inidoro.
Suno diri, wala sang problema kun expert sa snake identifiation ang video uploader kag mahambal nga nakilal-an sini kun ano nga klase sang man-og ang ila nakit-an.
Gin-athag sini nga indi endemic sa Negros Island ang king cobra kag santo sa video wala man naglapad ang liog sini bangod kun nakabatyag sang threat ang cobra, ini mabato gid.
Suno pa diri, sa Negros Island ang rat snake ukon maninin ordinaryo nga makit-an kag ini nagapalagyo lang man kun may yara sang pamahog sa iya kabuhi.
Suno kay Gerangaya, indi sini mahambal kun ano gid nga klase sang man-og ang nakit-an sa inidoro bangod wala man sang may ginturn over sa ila kag nahibaloan nga nakapalagyo ang man-og.
Pahayag sini, kun matood man nga Philippine king cobra ang nakit-an, mahimo nga may yara lang sang illegal nga nagdala sang ini nga klase sang man-og diri.
Samtang, gin-athag man sini nga indi makasulod sa poso negro ang man-og kag indi ini makasaka pasulod sa inidoro.
Ginklaro man sini nga ang resort sa banwa ang titled area kag ini yara na sa gwa sang Northern Negros Natural Park.
Nagpaandam man si Gerangaya nga indi pagsakiton ukon pagpatyon ang wildlife animals nga amat-amat na nagadamo sa Negros.
