Aprubado na sa Sangguniang Panlungsod ang Resolution of No Objection (RONO) sang Clean Water para sa water supply sa pila ka mga barangay sa ciudad sang Bacolod.
Sa interview sang Bombo Radyo kay Councilor Bobby Rojas, Chairperson sa Committee on Energy and Public Utilities, ang Clean Water ang isa ka kumpanya nga maga-supply sang tubig sa Brgy Alangilan, Brgy Granada, Brgy Estefania kag Brgy. Villamonte.
Suno kay Rojas, bag-o lang ini nga kumpanya kag ang RONO ang isa sa ila nga requirements para sa application sa national level.
Apang paathag sang Konsehal, ini ang maga-agi pa sa madamo nga government agencies kaangay sang Local Water Utilities Administration (LWUA), National Water Resources Board (NWRB), Department of Environment and Natural Resources (DENR) kag iban pa.
Pahayag ni Rojas, matapos ang pag-abrubar sang Sanguniang Panlungsod, ang Clean Water ang nagakinahanglan pa magkuha sang permits kag iban pa nga requirements sa national government.
Nagalaum naman ini nga ma-comply sang kumpanya ang tanan nga requirements agud makasugod na sila pagpanagtag sang tubig sa nasambit nga mga baragay.
Nagapati ang Konsehal nga dako ini nga bulig bangud suno diri, kun madamo ang water suppliers sa ciudad indi na magproblema sa tubig ang mga pumuluyo sa ciudad.
